Wala ginadula sang spokesperson ni Senator Loren Legarda ang posibilidad nga magbalik sa Senate Majority ang nasambit nga senadora.
Suno kay Atty. Tony La Viña, posible nga nagaisturya na si Legarda sa mga kaupod niya sa Senado agud magbalik sa mayorya subong nga nagapabilin ini nga yara sa luwas sang pungsod matapos ang pila na sini ka extended medical leave.
Pahayag ni La Viña, normal ang paghalin-halin sang mga senador sa ila bloc, ilabi na subong nga apat na ka beses nga nabayluhan ang Senate president sa sulod sang apat ka tuig.
Madumduman nga ginkumpira ni Senate Secretary Rey Bantug nga yara na sa ika-anum nga tion nga ginpalawig ni Legarda ang iya medical leave.
Sa katapusan nga update, magalawig ini tubtob sa Oktubre 9 matapos nga nagpadulong si Legarda sa France sang Agosto.
Nahibaluan nga nagapangatubang sang mga alegasyon sa kaso nga plunder kag graft ang senadora may kaangtanan sa solar projects sang iya anak nga si Batangas Rep. Leandro Leviste nga subong nagabantay sa iya iloy nga ginapahayag may seryoso nga sakit.
