Indi na pagdayunon sang prosecution panel ang pagpresentar sang impeachment article batok kay Vice President Sara Duterte nga may kaangtanan sa alegasyon sang bribery.
Ginkumpirma ini subong nga adlaw, Oktubre 4, ni Manila Representative Joel Chua nga miyembro sang prosecution panel.
Suno kay Chua, nagapati sila nga bastante na ang ila napresentar nga mga ebidensya sa tatlo ka nauna nga impeachment articles.
“Sa tingin namin, medyo tatlo na yung napapatunayan namin at tingin naman namin enough na para at least hindi na tayo abutin next year,” suno kay Chua. “We are confident the three articles are enough to render justice to the Filipino people.”
Ang ginatumod sini amo ang articles nga nagatutok sa grave threat, confidential funds, kag unexplained wealth.
Ang gin-drop naman nga article nag-akusar kay Duterte sang culpable violation of the Constitution kag betrayal of public trust bangud sa gina-akusar nga paghatag ukon pagbaton sang suhol nga may kaangtanan sa mga opisyal sang Department of Education (DepEd) sang siya pa ang Secretary halin 2022 tubtob 2024.
Bangud sini nga development, ginapaabot nga matapos sang prosecution ang ila presentasyon sang ebidensya pagkatapos sang testimonya ni Anti–Money Laundering Council (AMLC) Executive Director Ronel Buenaventura, kaupod ang mga opisyal sang mga bangko, insurance companies kag Bureau of Internal Revenue (BIR).
Sa subong, gina-discuss pa sa impeachment court ang ikaduha nga article nga may kaangtanan sa gin-akusar nga unexplained wealth, paglapas sa mga patakaran sa Statement of Assets, Liabilities and Net Worth ukon SALN, kag ginaalegar nga wala pag-divest sang vice president sa iya mga business interests.
