Wala personal nga nag-atubang sa National Bureau of Investigation (NBI) sanday anay House Speaker Lord Allan Velasco kag iya asawa nga si Rowena apang ginpadala nila ang ila mga abogado agud magsabat sa mga alegasyon ni dismissed police officer Rodulfo Gracioso Jr.
Nag-abot ang mga abogado sang mag-asawa sa NBI headquarters sa Pasay bilang kabahin sang pag-imbestigar sang bureau sa sworn statement ni Gracioso.
Ginpanginwala ni Atty. Rowell Ilagan ang mga alegasyon batok sa mag-asawa ilabi na ang akusasyon nga naghatag ukon nagbulig sa paghatag sang kwarta ang mga Velasco sa pila ka indibidwal.
Ginkumpirmar ni Ilagan nga nakilala ni Velasco si Gracioso apang wala niya ginpahayag kon ano ang ila relasyon. Wala man gindetalye ni Ilagan kon diin subong yara ang mag-asawa bangud may kinamatarong sila bilang pribado nga mga pumuluyo.
“Mali pong isipin na [tumakas sila]. As private citizens, we can freely travel. That is one of our constitutional rights as an individual,” suno sa legal counsel.
Sang ginpamangkot kon magabalik sa Pilipinas ang mga Velasco, nagsiling si Ilagan nga ini nga bagay paga-atubangon sa “proper forum and at the proper time.”
Ginpahayag man ni Ilagan nga magakooperar si Velasco sa imbestigasyon sang NBI apang kinahanglan anay matul-id ang mga alegasyon ni Gracioso.
Ginkwestyon man ni Ilagan ang credibility ni Gracioso, bangud gin-dismiss ini sa serbisyo kag ginsiling nga may mga kaso man ini sang misconduct sa iya personal kag professional nga kabuhi.
Matandaan nga gin-alegar sang nasambit nga dismissed police personnel nga nagdul-ong siya sang masobra P2 billion kay Vice President Sara Duterte, P1 billion kay former President Rodrigo Duterte, kag P100 million kay Rep. Pulong Duterte sang 2018 kasunod sang instruction ni Velasco.
Nagpaidalom siya sa lie detector test sang Myerkules kun sa diin “no deception indicated” suno sa assessment sang NBI.#
