Ginpanginwala ni Department of Social Welfare and Development (DSWD) Secretary Rex Gatchalian nga may yara sang delay sa payout sang Unified Package for Livelihoods, Industry, Food, and Transport (UPLIFT) Assistance kasunod sang mga palamangkutanon sang publiko
Sa interview sang Bombo Radyo kay Secretary Gatchalian, iya ginpahayag nga wala sang delay sa UPLIFT Assistance, kundi may yara ini sang ginatakda nga schedule sa pag-release sang bulig nga nagabalor sang P2,000 para sa kwalipikado nga benepisyaryo.
Suno kay Gatchalian, ginapatuman ang payout kada ika-14 tubtob ika-16 nga adlaw sang bulan.
Samtang, ginpahayag niya nga ika-duha nga batch sang mga kwalipikado nga benepisyaryo ang ginaprocess na subong nga tion kag ginalauman nga makuha na ini sa nasambit nga petsa subong nga bulan sang Oktubre.
Pahayag pa ni Gatchalian, ginapalapad sang Social Security System (SSS) ang listahan sang mga low-wage earners nga makabaton sang UPLIFT Assistance. Bangud sini, kinahanglan pa sang tion para ma-identify ang mga bag-o nga kwalipikado kag ma-activate ang ila basic deposit accounts.
Ginpahayag pa niya, ang mga bag-o nga beneficiaries ang makabaton sang notification paagi sa MySSS application, gani ginapanawagan ang mga ini nga i-update ang ila records kag iban pa nga kinahanglanon.
Dugang pa, ginpaathag ni Gatchalian nga ang paghulat sang iban nga beneficiaries indi nagakahulugan nga na-delay ang programa, bangud may yara sang schedule kag proseso nga ginapatuman antes ma-release ang assistance.
