Pabor si Governor Arthur Defensor Jr. nga ibalik sa mga dalan kag sa sentro sang syudad ang performances sang mga tribu sa Dinagyang Festival 2027.
Suno sa Gobernador, ginatugyan sini sa Iloilo City Government kag Iloilo Festivals Foundation, Inc. ang mangin plano sa kun diin ipahamtang ang mga judging areas.
Pahayag pa sini nga mas maayo nga ibalik sa kinaandan nga mga judging areas agud nga mas mangin hilway sa publiko ang paglantaw sang kahiwatan.
Nahibaluan nga ipahamtang ang mga judging areas sa bahin sang Iloilo Freedom Grandstand, Iloilo Provincial Capitol, Quezon-Ledesma Street, Mabini-De Leon Street kag Iznart Street.
Gin-athag man sang gobernador nga nagakaangay ang mga dalanon nga gamiton agud nga makalantaw ang tanan.
Sa matandaan nga may ara sang pagpakamalaot nga natabo sang nagligad nga Dinagyang bangud man sa mga judging areas nga ginhamtangan para sa performances sang mga tribu.
Gindugang man sang gobernador nga suportado kag masunod lamang ang Provincial Government sa mangin desisyon kag plano sang Iloilo City Government kag Iloilo Festivals Foundation, Inc. nahanungod sa palaabuton nga Dinagyang 2027.
