Naggamit ang China Coast Guard (CCG) sang water cannon samtang naga-ikog sa barko sang Philippine Coast Guard (PCG) nga nagabulig sa pagpatigayon sang emergency medical evacuation mission sa Ayungin Shoal.
Suno kay PCG spokesperson for the West Philippine Sea Rear Admiral Jay Tarriela, naatrasar sang halos 10 ka oras ang medical evacuation bangud sa aktwasyon sang CCG.
Ginsiling ni Tarriela nga samtang yara ang BRP Cabra ginabanta siyam ka nautical miles sa naaminhan sang Ayungin Shoal, gin-activate sang Chinese vessel ang ila nga water cannon kag nagpalapit tubtob sa 400 yards sa PCG vessel.
Wala maigu sang water cannon ang BRP Cabra apang padayon ini nga gin-ikugan sang CCG samtang nagapadayon sa misyon.
“It kept the water cannon running as it closed in from about 1.3 nautical miles to roughly 400 yards of the PCG vessel, in an apparent attempt to drive BRP Cabra away from the shoal. BRP Cabra was not hit,” pagdetalye ni Tarriela sa iya nga post.
Suno sa PCG, gin-radio challenge man sang CCG ang BRP Cabra kag ginpangabay nga magbalhin sa mas malayo nga rendezvous point.
Bangud sini, gin-adjust sang PCG ang operasyon kag ginpadala ang rigid-hull inflatable boat ukon RHIB agud kuhaon ang pasyente nga yara sa BRP Sierra Madre.
“The PCG put the patient’s welfare first and adjusted its operations,” dugang sini.
Ginkumpirma ni Tarriela nga luwas sa katalagman nga nasaylo ang pasyente sa PCG RHIB sang alas-3:15 sang hapon kag nadala sa BRP Cabra antes mag-alas-5 sang hapon.
Suno kay Tarriela, ang amo nga medical transfer dapat matapos sa sulod lamang sang pila ka oras, apang naglawig ini sang halos 10 ka oras bangud sa water cannon, pagbalhin sang rendezvous point, kag padayon nga pag-ikog sa ila sang CCG.
Gin-report man sang opisyal nga stable na ang kondisyon sang AFP personnel nga sakay sang BRP Sierra Madre kag ginadala sa pinakamalapit nga pantalan para sa dugang nga pagbulong.
“Ayungin Shoal lies within the Philippines’ exclusive economic zone, as affirmed by the 1982 UNCLOS (United Nations Convention on the Law of the Sea) and the final and binding 2016 Arbitral Award. Giving medical care to Filipino personnel stationed there is the government’s sovereign responsibility, not a privilege granted by any foreign power,” suno kay Tarriela.
Dugang sini: “Using a water cannon during a humanitarian mission is dangerous and unlawful. It puts lives at sea at risk and violates basic standards of maritime conduct.”
Ginpanawagan naman ni PCG Commandant Admiral Ronnie Gil Gavan ang CCG nga respetuhon ang humanitarian kag medical evacuation missions kag indi magpanghilabot ukon magpa-delay sa operasyon kun may kabuhi nga yara sa peligro.
