Ginkumpirma ni House prosecutor Jonathan Keith Flores nga naka-file na sila sang manifestation agud i-atras ang bribery article sa impeachment trial ni Vice President Sara Duterte.
Suno kay Flores, wala na sang kinahanglan nga approval halin sa impeachment court, kundi kinahanglan lamang nga ipahibalo sa korte nga indi na magpresentar ang prosecution sang ebidensya parte sa nasambit nga article.
Dugang pa ni Flores, para sa prosecution, bastante na ang ila napresentar nga ebidensya sa tatlo ka articles sang impeachment nga nakasentro sa grave threats, confidential funds, kag ang nagapadayon subong nga amo ang unexplained wealth.
“The decision to not proceed with the bribery (charge) had nothing to do with the strength of the case. We’re conscious about the timetable that the prosecution set for us to prosecute the entire articles of impeachment. But it no longer fit the timetable that we set to ourselves,” suno kay Flores nga amo ang nagapanguna sa team sa bribery case.
Suno pa sa iya, kon padayon pa nila nga palawigon ang proseso, mahimo nga maubos ang pasensya indi lamang sang publiko kundi pati man sang mga senador nga nagaserbe bilang mga hukom sa impeachment trial.
Nagakahulugan ini nga tapuson na sang prosecution ang ila presentasyon sang mga ebidensya sa kaso ni Duterte nga may kaangtanan sa ginapatihan nga indi maathag nga ginhalinan sang iya manggad.
Sa imbestigasyon sang House Committee on Good Government sang 2024, ginpahayag ni Edward Fajarda nga sadto special disbursing officer sang Department of Education ukon DepEd nga sang si Duterte pa ang nagaserbe bilang tiglikom sang ahensya, ginmanduan siya sini nga maghatag sang kwarta sa mga school superintendent paagi sa ila mga bank account.
Sa umpisa, nag-request ang prosecution sang walo ka adlaw nga trial agud ipresentar ang ila kaso parte sa bribery kag naglista sang apat ka posible nga testigo.
Lakip sa mga ini ang mga ginapatihan nga nakabaton ukon ginhatagan sang tanyag nga suhol halin sa opisina ni Duterte sa DepEd, lakip si anay DepEd Undersecretary Gloria Jumamil-Mercado kag anay chairperson sang Bids and Awards Committee nga si Resty Osias.#
