Ginsapubliko na sang administrasyon ni US President Donald Trump ang mas masangkad nga sanctions batok sa International Criminal Court (ICC) agud mapunggan ang ginakabig sini nga pagpanghilabot sa soberanya sang Estados Unidos sang Amerika.
Suno kay U.S. Secretary of State Marco Rubio, pagadumilian ang mga kompanya kag entities sang Amerika nga magpatigayon sang transaksiyon sa ICC.
Pahayag ni Rubio, indi magpasugot si Trump nga imbestigaran sang ICC ang mga Amerikano. Dugang sini: “Either the ICC will end its threats, or we will end the ICC.”
Ang pagpahibalo sang sanctions natabo pila lang ka oras matapos nga nakabaton si anay ICC judge Navi Pillay sang 2026 Nobel Peace Prize bangod sa iya mga panikasog nga mapasanyog ang kalinong kag international law.
Matandaan nga nadagdagan na anay sang sanctions sang Estados Unidos ang 17 ka hukom kag opisyal sang ICC, apang sa sini nga tikang, ang korte mismo ang gin-target agud mapaluya ang pinansyal nga kapasidad sini nga magpadayon sa operasyon.
Apang, naghatag ang Estados Unidos sang anum ka bulan nga grace period antes ipatuman ang pila sa bag-o nga sanctions, gani mahimo gihapon nga magpadayon ang mga miyembro nga pungsod sa paghatag sang pondo para sa operasyon sang korte.
Nagpabutyag naman sang padayon nga suporta sa ICC ang United Kingdom, Canada, France, Germany, Italy, Japan, Denmark kag Netherlands, kag ginpahayag ang ila pagsupak sa sanctions.
Gintawag naman ni UN Secretary General Antonio Guterres ang US decision nga “a serious blow to our collective pursuit of international criminal justice, of which the ICC is a key pillar”.
Suno naman kay ICC President Tomoko Akane, ginapuntariya sang US ang court operations kag gina-intimidate ang mga naga-trabaho kag naga-kooperar sa ICC, apang dugang niya, indi sila magpalingkang.
“The Court will continue to fully discharge its mandate, with independence and impartiality, acting only on the basis of the law and the evidence, for the sake of the countless victims of grave crimes,” suno kay Akane.
Nahibaluan nga gintukod ang ICC sang 2022 agud nga mag-prosecute sang war crimes, crimes against humanity, kag genocide. May yara ini sang 125 countries nga member states, apang may mga dalagku naman nga pungsod nga indi myembro sang korte kaangay sang US, Russia, China, India, kag Israel.#
