Nagakinahanglan ang Iloilo Provincial Government sang P7.86 billion nga annual budget para sa tuig 2027, ukon malapit sa P1 billion nga mas mataas kun ipaanggid sa P6.88 billion nga budget nga gin-aprubahan para sa subong nga tuig 2026.
Sa interview sang Bombo Radyo kay Governor Defensor, sandig sa proposed budget, ang dugang nga pondo natalana para sa infrastructure projects, operasyon sang district hospitals kag iban pa nga importante nga public services sang probinsya.
Setyembre 30, 2026 sang ginpasa sang gobernador ang proposed 2027 budget sa Sangguniang Panlalawigan para sa deliberation kag approval.
Kun matandaan, sang Nobyembre 2025, gin-aprubahan sang SP ang 2026 budget nagabalor sang P6.88 billion.
Para naman sa 2027, nagapangayo ang provincial government sang kabug-osan nga P7,860,387,336.
Kun ipaangid sa 2026 budget, ang proposed 2027 budget nagdugang sang P980.26 million ukon 14.2% ang pagtaas.
Sa nasambit nga proposed budget, P6.10 billion ang ipain para sa General Fund, samtang P1.76 billion ang para sa Local Economic Enterprises (LEE), nga nagalakip sang mga district hospitals nga ginadumalahan sang probinsya.
Sa 2026 budget, P5.53 billion ang General Fund kag P1.35 billion ang para sa LEE.
Nagakahulugan nga ang General Fund para sa 2027 ang nagdugang sang mga ₱571.14 million kag ang Local Economic Enterprises nagdugang sang P409.12 million.
Ang General Fund amo ang pondo para sa nagkalain-lain nga programa, proyekto kag operasyon sang provincial government.
Samtang ang LEE budget amo ang pondo nga may kaangtanan sa operasyon sang mga local economic enterprise, lakip na ang district hospitals.
Suno kay Defensor, ang Provincial Engineering Office ang makabaton sang pinakadako nga bahin sang departmental funding bangud ini ang nagadumala sa pagpatuman sang mga infrastructure project.
Lakip sa sini ang construction kag improvement sang mga dalan, eskwelahan kag iban pa nga public facilities.
Sa proposed General Fund, ang mga nagapanguna nga alokasyon amo ang masunod;
*P1.314 billion – Personnel Services ukon sweldo kag benepisyo sang government personnel.
*P2.292 billion – Maintenance and Other Operating Expenses (MOOE), ukon mga galastuhan sa adlaw-adlaw nga operasyon sang mga opisina kag programa.
*P160.82 million – Capital Outlay, ukon pondo para sa mga asset kag proyekto nga may malawig nga gamit.
Lakip man sa proposed budget ang P1.165 billion para sa 20-percent National Tax Allotment (NTA) Development Fund.
Ini nga pondo ang para sa development projects sang probinsya.
May P305.08 million man nga gintalana para sa Provincial Disaster Risk Reduction and Management Fund (PDRRMF), nga ginagamit para sa disaster preparedness, response kag iban pa nga kinahanglanon may kaangtanan sa kalamidad.
May yara man sang pondo para sa bulig sa mga barangay, Commission on Elections (Comelec), terminal leave payments kag advances para sa Local Economic Enterprises.
Suno sa gobernador, ang padayon nga pagdaku sang budget sang probinsya may kaangtanan sa pagtaas sang share sini sa National Tax Allotment (NTA).
Ang NTA amo ang bahin sang national government revenue nga ginahatag sa local government units (LGUs) agud magamit sa ila mga programa, proyekto kag operasyon.
Samtang, nag-umpisa naman ang SP Committee on Appropriations sa deliberation sa proposed 2027 budget, nga ginapangunahan ni 4th District Board Member Dominic Paul Oso.
Diri usisaon sang komitiba ang mga alokasyon kag spending priorities antes ini dal-on sa masunod nga proseso sang legislative approval.
By: Bombo Lynd-C Bade
