Nagapanawagan sang kooperayson ang barangay official sang Brgy. Hibao-an Norte sa Distrito sang Mandurriao sa ila mga pumuluyo agud malakip na sila sa drug-cleared barangay.
Sa interview sang Bombo Radyo kay Punong Barangay Ariel Mirar, iya ginpahayag nga isa ka pagpanghangkat sa ila amo nga madamo sa ila pumuluyo ang naga-engage sa illegal nga droga, rason nga nadugayan ang ila barangay sa pagpasa sang mga dokumento.
Suno pa sa iya nga may mga wala pa makatapos sa programa kun sa diin may yara pa sang 14 ka indibidwal nga wala pa maka-graduate.
Gani padayon ang ila panawagan nga magkooperar ang mga ini agud makompleto ang mga kinahanglanon.
Suno kay Mirar, kun malab-ot sang barangay ang drug-cleared status, indi lamang ini mangin kadalag-an sang barangay kag sang ila mga pumuluyo, kundi mangin kadalag-an man ini sang syudad.
Lakip sa ila ginatutukan ang Barangay Anti-Drug Abuse Council ukon BADAC list agud masiguro ang mga indibidwal nga wala pa maka-graduate sa programa.
Dugang pa sini nga ila gid tinguhaan nga mangin kabahin sila sa 134 drug-cleared barangay sa syudad antes matapos ang tuig.
