Nagapreparar na ang Iloilo City government sang contingency plans batok sa posible nga severe drought nga mahimo magresulta sa 60 tubtob 80% nga pagnubo sang suplay sang tubig kag pagsaka sang heat index sa 48 degrees Celsius ukon mas mataas pa sa Pebrero tubtob Marso 2027 ukon mas malawig pa.
Sa interview sang Bombo Radyo kay Joy Fantilaga-Gorzal, Spokesperson ni Mayor Raisa Treñas, iya ginpahayag nga indi lamang suplay sang tubig ang posible nga maapektuhan kundi lakip man ang kuryente, food security, ikaayong lawas, palangabuhian sang mga pumuluyo kag peace and order.
Suno kay Gorzal, base sa datos nga ginpresentar sa scientific forum angut sa posible nga epekto sang strong to very strong El Niño sa siyudad, may yara sang nagkalain-lain nga scenario ang ginplastar.
Kun sa diin sa pinakaulihi nga scenario nga ginalantaw sa Pebrero tubtob Marso 2027 ukon mas malawig pa, posible nga maga-atubang ang siyudad sang severe drought, nga may 60 tubtob 80% nga pagnubo sang suplay sang tubig kag heat index nga mahimo maglab-ot sa 48 degrees Celsius ukon mas mataas pa.
Pahayag pa nga posible man ang rotational water rationing kag magdamo ang kaso sang heat-related illnesses.
Pagpaathag ni Gorzal, ang mga scenario mga basehan pa lamang sa pagplano kag indi kumpirmado nga forecast.
Ginpahayag pa niya, kung magkulang ang suplay sang tubig kag kuryente, posible maapektuhan ang mga panimalay, eskwelahan, ospital kag negosyo, lakip ang trabaho sang mga pumuluyo.
Mahimo man maglala ang risgo sa ikaayong lawas sang mga senior citizen, kabataan, mga may yara sang existing health conditions kag mga nagatrabaho sa guwa nga direkta nga na-expose sa init.
Posible man nga maapektuhan ang produksyon sa agrikultura kag suplay sang pagkaon, nga mahimo magresulta sa pagsaka sang presyo sang mga balaklon.
Dugang pa ni Gorzal, bilang kabahin sang pagpanghanda sang syudad, ginmanduan na ni Mayor Treñas ang mga concerned offices kag response clusters nga magpreparar sang mga contingency plan agud indi na maghulat nga maglala ang sitwasyon antes maghimo sang tikang.
