Nagpahayag sang kahandaan ang House Prosecution Panel sa tion nga mag-atubang na sa impeachment court ang witness sang depensa sa nagapadayon nga impeachment trial ni Vice President Sara Duterte.
Sa interview sang Bombo Radyo kay Atty. Hez Montalan, deputy spokesperson for the prosecution, iya ginpahayag nga handa ang ila team nga mag-cross-examine sa mga witnesses sang depensa kag mag-object sa mga pamangkot nga ila makabig nga questionable ukon indi nagakaigo suno sa rules sang proceedings.
Ginsabat man ni Atty. Montalan sang ‘Bring it on’ ang pamangkot kon ano sila kahanda nga atubangon ang mga witnesses sang kampo ni Duterte.
Suno sa iya, preparado kag handa ang prosecution team nga usisaon ang testimonya kag ebidensya nga ipresentar sang depensa.
Samtang, ginpahayag man ni Atty. Montalan nga pagkatapos sang presentasyon ni Atty. Alex Cabrera angut sa financial findings nga may kaangtanan sa gin-alegar nga ₱817 milyones nga unexplained wealth ni Duterte, plano sang prosecution nga tapuson na ang ila presentasyon sang ebidensya sa amo nga bahin sang kaso.
Ini bangud para sa ila, igo na ang ginpresentar nga findings agud suportahan ang ila argumento para sa impeachment.
Dugang pa ni Atty. Montalan, ginakabig sang House Prosecution Panel nga ang nasambit nga gin-alegar nga ₱817 milyones nga unexplained wealth sang bise president ang isa sa pinakamabaskog nga ebidensya ukon ila ginakabig nga ‘smoking gun’ agud nga ma-impeach ang bise presidente.
