Nagdangat na sa apat ka Pilipino ang na-report nga nasamaran sa pag-atake sa King Khalid International Airport sa Riyadh, Saudi Arabia, sang Sabado, Oktubre 10.
Suno sa Department of Migrant Workers (DMW), tatlo sa mga nasamaran ang yara sa intensive care unit ukon ICU, samtang ang isa naman ang ginapaabot nga makaguwa na sa ospital.
Wala sang Pilipino nga nareport nga napatay sa insidente.
Sa kabug-usan, 12 ka tawo ang napatay kag 309 ang nasamaran sa pag-atake nga ginpatigayon sang Houthi.
Padayon nga nagahatag sang bulig ang Migrant Workers Office (MWO) kag ang Overseas Workers Welfare Administration (OWWA) sa mga Pilipino nga nasamaran.
Nagapakig-angot man ang ila talatapan sa lokal nga mga awtoridad kag ospital agud masiguro kon may iban pa nga Pilipino nga naapektuhan sang pag-atake.
Ginapanugyanan sang DMW ang mga Overseas Filipino Workers (OFWs) sa Saudi Arabia nga maglikaw sa mga lugar nga posible target sang pag-atake, amo man nga magsunod sa mga pahibalo sang embahada kag mga opisina sang MWO.
Para sa mga OFW nga mapauli na sa Pilipinas, ginapahanumdom gid ang mga ini nga mag-contact anay sa ila airline antes magkadto sa airport.
Nahibaluan nga nakabatun liwat sang panibag-o nga pagpang-atake ang King Khalid International Airport sa Riyadh, Saudi Arabia, kahapon nga adlaw, Oct. 11.
