Nagapadayun ang preparasyon sang mga mangunguma sa Mina, Iloilo sa posible maeksperyensyahan kag mangin halit sang El Niño phenenomenon sa ila nga mga produkto.
Sa interview sang Bombo Radyo kay Helen Bolivar, Founder sang Mina Municipal Federation of Farmers Association (MMFF), iya ginpahayag nga importante man nga nakahibalo ang mga mangunguma kun ano ang mga dapat likawan kag maayo nga itanom sa tion sang tuman ka init nga panahon.
Kasunod ini sang plano sang National Irrigation Administration (NIA) nga engganyuhon ang ila beneficiaries nga mag-double dry cropping ukon magtanum sang ila produkto sa Marso, agud maka-harvest ang mga ini sa bulan sang Hulyo.
Tinutuyo sang nasambit nga inisyatibo nga madugangan ang suplay sang bugas sa pungsod.
Apang pahayag naman ni Bolivar, mas maayo nga hatagan na lang sang atensyon sang mga mangunguma ang fast crop, ukon ang pagtanom sang produkto nga wala gid nagakinahanglan sang tuman ka damo nga tubig.
Lakip na diri ang mga utanon nga mahimo man nga mabaligya sang farmers, apisar sang epekto sang El Niño phenomenon.
