Ginpaathag sang isa ka legal expert nga dako ang papel sang testigo nga isa ka forensic expert nga amo si Atty. Alexander Cabrera sa pagbusisi sang mga ebidensya nga ginpresentar sang prosecution sa impeachment proceedings batok kay Vice President Sara Duterte angut sa nagkalain-lain nga financial records sang bise president.
Sa interview sang Bombo Radyo kay Atty. Noel Palomado, former legal officer sang Commission on Audit kag former auditor sang United Nations, iya ginpahayag nga bilang eksperto sa forensic fraud investigation si Cabrera, gintahi-tahi sini ang mga impormasyon halin sa nagkalain-lain nga opisyal nga dokumento agud mahangpan ang kabug-usan sang mga transaksyon sang mga financial transactions sa ginapahayag nga undeclared ukon unexplained wealth sang bise presidente kag sa iya bana nga si Atty. Manases Carpio.
Suno kay Palomado, kinahanglan ang kaalam sang isa ka eksperto sa accounting kag financial investigation agud maangot kag mahangpan ang mga impormasyon sang mga dokumento nga ginpresentar sa korte.
Ginpakigbahin man ni Palomado nga para sa iya, isa si Cabrera sa pinaka-credible nga testigo sa impeachment proceedings bangud sa iya malawig nga eksperyensya sa forensic fraud investigation kag sa iya abilidad sa pagpresentar sang detalyado nga findings apisar nga ginakuwestyon sang depensa ang iya qualifications sa cross-examination.
Matadaan nga base sa ginbuyagyag ni Cabrera sa impeachment proceedings, naglab-ot sa ginabulubanta ₱817 milyon ang ginapahayag nga undeclared ukon unexplained wealth sang bise president kag iya nga bana.
Dugang pa ni Palomado nga ginabantayan sang publiko ang mangin sabat sang depensa sa findings ni Cabrera.
Ini bangud suno sa abogado, tubtob subong wala pa sa gihapon may ginapresentar ang depensa ang testigo agud magpresentar sang ila ebidensya kag sabton ang mga alegasyon sang prosecution.
