Nagpabutyag sang kalipay ang Association of Iloilo Provincial Government Employees (AIPGE) sa positibo nga sabat ni Iloilo Governor Arthur R. Defensor Jr. sa ila ginapanawagan nga affordable housing program para sa mga empleyado sang Iloilo Provincial Government (IPG).
Sa interview sang Bombo Radyo kay AIPGE President Joecil Mayor, iya ginpahayag nga nagpatawag na si Defensor sang cluster meeting agud talakayon ang posibilidad sang pagpatuman sang housing program, lakip ang mga posible nga lugar kag mekanismo agud makabenepisyo ang mga kwalipikado nga empleyado.
May mga lugar na nga ginakonsidera para sa proyekto, lakip ang sa distrito sang La Paz sa syudad sang Iloilo kag Santa Barbara, Iloilo.
Ginpahayag ni Mayor nga may 5.7 ektarya nga propedad ang Iloilo Provincial Government sa La Paz, sa likod sang Iloilo Sports Complex, apang padayon pa ang negosasyon tuhoy sa sini.
Dugang pa niya, may yara na sang housing board ang provincial government nga amo ang magatalakay kun sin-o ang kwalipikado nga makabenepisyo kag kun paano makakuha sang housing assistance.
Ginapaathag ni Mayor nga yara sa kapin 2,000 ang regular nga empleyado sang IPG, wala pa nalakip diri ang mga contract of service kag job-hire workers.
Ginahimo man sa subong ang profiling sang mga empleyado bilang kabahin sang inisyal nga pagplano.
Nagtipon naman ang AIPGE kay Iloilo Provincial Administrator Dr. Raul Banias kag sa iban nga mga department head agud talakayon ang posibilidad sang programa.
Suno kay Mayor, ginatinguhaan sang asosasyon nga madala sa gobernador ang mga kinahanglanon kag ginapangayo sang mga empleyado, ilabi na sa tunga sang nagataas nga presyo sang mga balaklon kag plete sa transportasyon.
Paathag niya, kun may mas barato kag mas masaligan nga housing option, mahimo nga mabuhinan ang pinansyal nga kabudlayan sang mga empleyado kag makakinot sila sang mas daku nga bahin sang ila kita para sa pagkaon kag iban pa nga pang adlaw-adlaw nga kinahanglanon sang pamilya.
Apisar yara pa sa lang inisyal nga bahin ang pagplano kag wala pa sang pinal nga detalye sa implementasyon, ginpahayag ni Mayor nga nalipay gid ang AIPGE bangud wala ginbalibaran sang gobernador ang ila panawagan kag ginhatagan ini sang tikang agud matalakay pa.
Text by: Bombo Lynd-C Bade
