Ginapatadlong ni Senador Panfilo Lacson sa Spokeperson ni VP Sara Duterte nga si Atty. Salvador Paolo Panelo Jr. ang pahayag sini nga naggasto ang Senado sang ₱500 milyon para sa impeachment trial sang bise presidente.
Base sa pahayag ni Panelo, naglab-ot sa ₱25 milyon kada adlaw ang gastos sa impeachment trial kag nagalab-ot ini sa 500 milyon pesos sa sulod sang 20 ka adlaw nga trial.
Gin-athag naman ni Lacson nga ang ₱25 milyon amo ang gingasto sa kabilugan nga operasyon sang Senado kag indi lamang sa impeachment trial.
Dugang pa ni Lacson, ₱27 milyon lamang ang gin-alokar sa national budget para sa bug-os nga trial, kag mga ₱2 milyon sa sini ang nagasto sa mga toga kag iban pa nga kinahanglanon.
Samtang, ginpahayag ni Senate President Win Gatchalian nga indi matuod ang ₱500 milyon nga pagbanta ni Panelo bangod nalakip diri ang suweldo sang mga senador kag empleyado, renta, kuryente kag iban pa nga galastuhon sa pagpadalagan sang bug-os nga Senado.
Suno kay Gatchalian, ang direkta nga gasto para sa impeachment trial sa sulod sang 44 ka adlaw naglab-ot lamang sa masobra ₱14 milyon, ukon ginabanta masobra sa ₱300, 000 kada adlaw.
