Ginplastar ni former Iloilo Fifth District Representative Neil “Junjun” Tupas Jr. nga nagserbe sadto nga lead prosecutor sa 2012 impeachment trial ni anay Chief Justice Renato Corona, nga importante nga mahatagan sang tsansa ang depensa ni Vice President Sara Duterte nga sabton ang mga akusasyon nga napresentar na sa impeachment court bag-o ginbawi sang prosecution panel.
Sa interview sang Bombo Radyo kay Tupas, iya ginpahayag nga apisar gintugutan sang presiding officer ang pag-withdraw sang mga articles of impeachment santo sa pagsulundan sang Senado, may nakatapik diri nga isyu sang fairness kag due process bangud napresentar na sa publiko ang mga akusasyon batok sa bise presidente.
Ginpaathag ni Tupas nga sa ordinaryo nga trial, kinahanglan nga timbangon sang hukmanan ang mga ebidensya nga ginpresentar sang magtimbang nga bahin bag-o magdesisyon.
Apang, lain ang impeachment court bangud ang mga senador ang wala lang nagalantaw sa mga legal nga argumento kundi nagakaapektuhan man ang panan-awan kag opinyon sang publiko.
Bangud sini, ginsiling ni Tupas nga posible nga may matabo nga kompromiso agud mahatagan tsansa ang depensa nga makasabat partikular ang mga alegasyon angot sa grave threats kag confidential funds.
