Arestado ang 58-anyos nga nagabaligya sang isda kag tokhang surrenderer sa buy-bust operation sang kapulisan sa Barangay Sto. Niño Sur, Arevalo, Iloilo City, alas-4 sang hapon, Oktubre 13.
Ginkilala ang subject sa alyas nga Ricky, nga gin-alegar nagabaligya sang iligal nga druga.
Sa interview sang Bombo Radyo kay Police Major Mavi Laraño, hepe sang Arevalo Municipal Police Station (MPS), iya ginpahayag ang mga detalye may kaangtanan sa nasambit nga operasyon.
Narekober sa operasyon ang tatlo ka gramos sang ginapatihan shabu nga may balor nga ₱20,400.
Gin-ako ni Ricky nga nagagamit siya sang iligal nga druga, apang ginpanginwala niya ang alegasyon nga nagabaligya siya sini.
Yara na sa kustodiya sang kapulisan ang subject samtang ginaproseso ang nagakaigo nga kaso batok sa iya.
Text by: Bombo Jay Panizales
