Magapatigayon sang joint inspections sa mga balaligyaan sang karne sa Iloilo City ang National Meat Inspection Service (NMIS) kag Iloilo City Government agud masiguro nga nagasunod ang mga vendors sa nagakaigo nga meat handling practices kag malikawan ang pagbaligya sang double dead nga karne.
Kabahin ini sang 33rd Meat Safety Consciousness Week nga pangunahan sang NMIS halin Oktubre 19 tubtob 23, 2026, nga may tema nga “One Nation, One Commitment: Safe, Clean, and Quality Meat for All.”
Suno kay April Chavez, OIC Regional Technical sang NMIS-6, ginapabaskog sang selebrasyon ang koordinasyon kag pagbinuligay sang nagkalain-lain nga ahensya kag stakeholders agud mapatuman ang mga regulasyon kag maprotektaran ang publiko.
Antes ang inspeksyon sa mga merkado, magahiwat ang NMIS sang opening ceremony kag motorcade nga magapakita sang papel sang mga rehistrado nga meat transport vehicles sa pagsiguro nga matinlo kag safe ang pagdala sang karne sa mga balaligyaan.
Magahiwat man sang meat safety advocacy seminar para sa mga vendors, butchers kag meat handlers agud mapalapnag ang kaalam parte sa hygienic handling sang karne, samtang may libre nga webinar para sa publiko nahanungod sa food safety kag mga regulasyon sa paghandle sang karne.
Dugang pa diri, magabulig ang NMIS sa mga local government units sa pag-usisa sang sanitation sa mga slaughterhouse agud masiguro nga nagasunod sa nagakaigo nga pamaagi ang pag-ihaw sang mga sapat.
Ginapanumdom man ni Chavez ang mga konsumidor nga tan-awon ang Meat Inspection Certificate (MIC) nga gin-isyu sang awtorisado nga meat inspectors.
Kinahanglan nga klaro ini nga naka-display sa pwesto sang vendor bilang pamatuod nga ang karne nakaagi sa meat inspection.
Paagi sa kampanya, ginatinguhaan sang NMIS kag Iloilo City Government nga mapabaskog ang pagsunod sa food safety regulations kag masiguro nga safe, matinlo kag de-kalidad nga karne ang nagaabot sa lamesa sang mga Ilonggo.
Text by: Bombo Cyrene A. Nasis
