Nagdulot sang katingala kag kalipay sa madamo apang nagresulta sa pagseparar sang ila grupo ang lima ka African Grey Parrots sa isa ka wildlife park sa England.
Ini matapos sila nga maanad sa pagpamuyayaw kag pagkadlaw sa mga bisita nga nagaagi sa ila enclosure.
Suno sa Lincolnshire Wildlife Centre, gin-upod anay nila para sa quarantine ang lima ka parrots nga sanday Billy, Eric, Tyson, Jade, kag Elsie.
Ini antes sila iupod sa mas dako nga grupo sang mga pispis.
Wala nagdugay, natalupangdan sang mga keeper nga daw ginaengganyo sang mga pispis ang isa kag isa nga magpamuyayaw.
Kon magsugod ang isa ka parrot, magasunod ang isa pa, kag dayon sila magakadlaw nga dungan.
Mas labi pa sila nga naga-engganyo kon makibot ukon magkadlaw ang mga bisita.
Ginpahayag sang wildlife centre nga ginagamit sang mga parrots ang reaksyon sang tawo bilang encouragement agud liwaton ang ila ginahimo.
Bisan pa nga makahuluya para sa kalabanan sang mga bisita sang zoo ang ila ginahimo kag wala man sang nagreklamo, nagdesisyon gihapon ang mga keeper nga bulagon sila.
Ini agud indi sila magtulod sa isa kag isa nga mamuyayaw kag agud indi mabatian sang mga kabataan nga nagabisita ang ila pagpamuyayaw.
Kilala ang African Grey Parrots sa ila mataas nga intelligence kag abilidad nga ilugon ang human speech.
Sa kaso sang lima ka pispis, ginapatihan nga importante man ang social learning.
Ini bangod ginapabakod sang reaksyon sang kada parrot ang pamatasan sang iban.
Sang ulihi, gintinguhaan sang mga keeper nga ibutang ang mga parrots sa mas dako nga grupo upod sa mga pispis nga wala nagagamit sang pareho nga malain nga mga pulong.
Ini sa paglaum nga amat-amat nga madula ang ila ‘naughty’ vocabulary.
