Nagapasiguro ang National Meat Inspection Service (NMIS) Region 6 nga luwas kag dekalidad ang karne nga ginabaligya sa Western Visayas.
Sa interview sang Bombo Radyo kay Dr. April Chavez, Regional Technical Director sang NMIS Region 6, iya ginpahayag nga kabahin sa misyon sang ahensya ang pagpasiguro nga ang karne nga ginabaligya kag ginakonsumo sang publiko nagasunod sa nagakaigo nga meat safety standards.
Suno kay Chavez, padayon ang pag-develop sang mga pamaagi kag paggamit sang advanced technology, lakip na ang food safety test kits, agud mahibaluan kun may presensya sang sakit sa karne.
Kabahin man sa ila kampanya ang Meat Safety Consciousness Week, nga nagatuyo pabaskuron ang ihibalo sang publiko tuhoy sa importansya sang safe nga karne.
Nagabuligay man ang NMIS sa nagkalain-lain nga partner agencies kag local government units (LGUs) agud mapabakod ang implementasyon sang meat inspection kag meat safety programs.
Nagapahanumdom man ini sa publiko nga siguraduhon ang karne nga ila ginabakal nag-agi sa nagakaigo nga meat inspection.
Ini agud maprotektahan ang ila ikaayong lawas kag malikawan ang mga balatian nga mahimo maghalin sa pagkonsumo sang kontaminado nga karne.
