Nagapanawagan ang Iloilo Police Provincial Office ukon IPPO sa responsable nga paggamit sang social media kasunod sang nagaluntad nga mga pagpamahog ukon security threats sa pila ka eskwelahan sa probinsya sang Iloilo.
Sa interview sang Bombo Radyo kay Police Lieutenant Arnel Solis, spokesperson sang IPPO, iya ginpahayag nga may posibilidad nga masunod sang mga kabataan ang ila ginalantaw kag gina-consume sa social media.
Gani, importante suno sa iya nga bantayan sang ginikanan ang ila mga kabataan kun sila mag-gamit sang mga gadgets.
Pahayag pa ni Solis nga padayon man ang ila nga information campaign agud tudluan ang mga school personnel kag mga estudyante kun ano ang dapat himuon kon may magluntad nga kaangay nga insidente.
Dugang pa sini nga wala man sila nagapabaya sa pagpatuman sang mga tikang agud masiguro ang seguridad sang mga estudyante kag mga personnel sa sulod sang mga eskwelahan.
Nahibaluan nga may nagluntad naman nga pagpamahog sa Iloilo Science and Technology University- Barotac Nuevo Campus sang Oktubre 13, samtang ginkanselar man ang klase sa isa ka buluthuan sa Calinog, Iloilo kahapon nga adlaw.
Nagapanawagan gid sila sa publiko nga magkooperar sa mga awtoridad kag gilayon magreport kun may pagpamahog agud malikawan ang posible nga peligro.
