Naga-ugtas si Iloilo Fourth District Board Member Rolando Distura sa mga truck nga padayon nga nagalabay sa Monfort-Vigilar Jalaur Bridge sa Barangay Nabitasan, Leganes, Iloilo, apisar ginadumilian na ang pag-agi sang mga salakyan nga may kabug-aton nga lima ka tonelada ukon masobra pa.
Nahibaluan nga temporaryo nga ginadumilian ang pag-agi sang mga heavy vehicle sa taytay samtang ginakay-o ini.
Suno kay BM Distura, bisan may mga signage na nga nagapahibalo sang restriction antes makaabot sa taytay, may mga truck gihapon nga nagatinguha nga maglabay.
Bangud sini, ginapanugyanan ni Distura ang mga truck driver kag operators sang heavy vehicles nga sundon ang temporaryo nga pagdumili kag maggamit sang alternatibo nga ruta agud malikawan ang posible nga aksidente.
Pahayag pa niya, sang September 29 pa ginpadal-an sang sulat sang District Engineer ang iya opisina parte sa temporaryo nga pagsarado kag pagdumili sang pag-agi sang mga heavy vehicle samtang nagapadayon ang pagkay-o sang taytay.
Dugang pa niya, sobra na sa 30 ka tuig ang taytay kag kinahanglan nga masiguro ang kaluwasan sang mga motorista rason sa pagkay-o sini agud masiguro nga mapag-on ang kondisyon sang taytay kag malikawan ang peligro sa mga nagalabay sa lugar.
