Ginpaidalom na sa Blue Alert Status ang Western Visayas bilang preparasyon sa ginapaabot nga super El Niño nga posible makaapekto sa ginabulubanta nga 733,000 ka pamilya sa rehiyon.
Sa interview sang Bombo Radyo Office of Civil Defense (OCD) Regional Director kag Regional Disaster Risk Reduction and Management Council (RDRRMC-6) spokesperson Raul Fernandez, iya ginpahayag nga insakto lang ang tion sa pagpatuman sang Blue Alert Status agud makasugod na ang mga ahensya sang gobyerno sa pagpanghanda sang mga kinahanglanon nga resources para sa mga komunidad nga posible maapektuhan.
Suno sa iya, madugay na nga ginapaandaman sang PAGASA ang publiko angut sa posibilidad sang very strong El Niño rason nga indi na kinahanglan hulaton pa nga mabatyagan ang aktuwal nga epekto sini antes magpatuman sang mga tikang sa pagpanghanda.
Pahayag niya, ginatutukan sang RDRRMC-6 kag sang mga kaupod nga ahensya ang nagkalain-lain nga sektor, lakip ang water security, food security, energy security, law and order, public safety, health security, economic security kag environmental ukon climate security.
Apang, ginahatagan sang prayoridad ang sektor sang agrikultura, ilabi na ang mga mangunguma kag manug-pangisda nga posible maapektuhan ang ila nga pangabuhian.
Ginatutukan man ang health sector bangud sa posibilidad sang pagsaka sang temperatura kag heat index, kag ang water sector agud masiguro ang seguridad sang suplay sang tubig.
Dugang pa ni Fernandez nga ginapabaskog man sang RDRRMC-6 kag sang nagkalain-lain nga ahensya sang gobyerno ang ila pagpanghanda agud mapahagan-hagan ang epekto sang malawig nga tag-init kag masiguro nga may yara sang kinahanglanon nga bulig para sa mga pamilya kag komunidad nga posible maapektuhan.
Nahibaluan nga paagi sa Blue Alert Status, mahimo na magamit ang mga resources sang national government agencies para sa nagkalain-lain nga preparedness measures agud mapahagan-hagan ang epekto sang El Niño.
