Ginpasalig sang Philippine Health Insurance Corporation ukon PhilHealth ang coverage para sa nagkalain-lain nga balatian nga may kaangtanan sa sobra nga kainit sang panahon, samtang ginapaabot nga magapadayon ang mabaskog nga El Niño tubtob sa tunga sang tuig 2027.
Sa interview sang Bombo Radyo kay Janimhe Jalbuna, Public Relations Officer sang PhilHealth Region 6, iya ginpahayag nga lakip sa mga balatian nga mahimo maglala sa tunga sang sobra nga kainit amo ang heat stroke, dehydration, hika ukon asthma, hypertension, kag mga impeksyon nga nagahalin sa kontaminado nga tubig.
Suno kay Jalbuna, ginapalig-on sang ahensya ang proteksyon sa panglawas sang publiko paagi sa outpatient kag inpatient benefits agud mabuligan ang mga miyembro nga makakuha sang nagakaigo nga serbisyong medikal.
Paagi sa Yaman ng Kalusugan Program ukon YAKAP, gin-agda sang ahensya ang mga pamilya nga magparehistro kag magkonsulta sa ila ginpili nga YAKAP Clinic para sa preventive kag primary health care services.
Lakip man sa mga benepisyo sini ang konsultasyon, nagakaigo nga laboratory kag diagnostic tests, kag outpatient cancer screening.
Samtang, paagi sa Outpatient Emergency Care Benefit ukon OECB, sakop man sang PhilHealth ang pila ka serbisyong emerhensya sa emergency room bisan indi ma-admit sa ospital, lakip ang konsultasyon sang doktor, diagnostic tests, imaging, emergency procedures, kag kinahanglanon nga bulong.
Para sa mga balatian naman nga nagakinahanglan sang pagpabilin sa ospital, nagabayad ang PhilHealth sang fixed case rates sa mga accredited hospital.
Ginpahanumdom man sang PhilHealth ang publiko nga magpa-checkup sang regular agud ma-detect kag makontrol ang mga balatian pareho sang hypertension, diabetes kag respiratory diseases nga mahimo maglala sa tunga sang sobra nga kainit.
Dugang pa ni Jalbuna, ang ini nga mga tikang ang kabahin sang pagpalig-on sang gobyerno sa pagprotektar sa ikaayong lawas sang publiko sunod sa mandu ni Presidente Ferdinand Marcos Jr. para sa mas aktibo nga lihuk batok sa epekto sang climate change, sa koordinasyon sang PhilHealth kag Department of Health (DOH).
