Maga-deploy sang 6,552 ka pulis, force multipliers kag iban pa nga security personnel gikan sa partnered agencies sa bug-os nga Western Visayas ang Police Regional Office 6 (PRO-6) balin Oktubre 31 tubtob Nobyembre 2.
Sa nasambit nga numero, 3,284 ang mga pulis, 2,098 ang force multipliers kag 1,170 ka security personnel gikan sa nagkalaio-lain nga ahensya pareho sang Bureau of Fire Protection, Armed Forces of the Philippines, Philippine Coast Guard kag Civil Aviation Authority of the Philippines.
Kadungan man sang deployment ang pagpa-idalum sang tanan nga unit sang kapulisan sa full alert status agud mapasiguro sang seguridad sang publiko kag pagmintinar sang kalinong kadungan sa pag-obserbar sang pista minatay.
Kabahin man sang deployment plan ang pagtutok sa mga lugar pareho sang patyo, simbahan, transport terminals, tourist destinations kag iban pa nga pampubliko nga lugar.
Ginapahayag pa nga may vara man sang mga kapulisan ang magapatigayon sang mobile patrol operations at may yara man sang mga pulis nga igapahamtang sa mga checkpoints agud masiguro nga malikawan ang ano man nga klase sang insidente kag mamintinar ang kalinong.
Ginpabug-atan ni PRO-6 Director PBGen. Randulf Tuano nga ang timprano nga paghanda kag maayo nga koordinasyon sa mga nagkalain-lain nga ahensya sang gobyerno ang daku nga importansya agud maprotektahan ang publike kag magpabilin nga mangin padinalag-on ang paghiwat sang pista minatay subong nga tuig.
Dugang pa, nagpahanumdum man si Tuaño sa publiko nga sundon ang mga protocol sang mga otoridad, amo man ang mga patakaran sang mga patyo agud mangin matawhay kag malinong ang tion sa pagdumdum sang kada isa sa ila mga pinalangga nga nagtaliwan.
