Ginapanindugan sang prosecution team nga “11 out of 10” ang kabaskugon sang ila nga ebidensya batok kay Vice President Sara Duterte sa impeachment trial.
Ini ang pagtan-aw ni House Prosecution Panel spokesperson Rep. Zia Alonto Adiong sang ginhingyo siya sang Bombo Radyo nga i-rate sang 1 tubtob 10 kun ano kabakod ang ila ebidensya, kun sa diin ang 1 amo ang pinakamanubo kag ang 10 amo ang pinakamataas.
“I’ll give you 11. Sobra pa ng isa,” sabat sang kongresista.
Suno kay Adiong, ini pa lamang ang impeachment trial nga may tama ka baskog kag bastante nga ebidensya.
“Ang lakas! Ngayon lang, isipin mo, ngayon lang ang impeachment trial na na-experience natin na sobrang lakas ng ebidensya,” dugang niya.
Amo man ini suno sa iya ang rason kun ngaa gin-withdraw na nila ang tatlo pa ka impeachment articles nga may kaangtanan sa mga alegasyon sang grave threats, sayop nga paggamit sang confidential funds, kag bribery. Ang ginpadayon na lamang nila nga akusasyon amo ang alegasyon sang indi maathag nga ginhalinan sang manggad si Duterte ukon ang unexplained wealth.
“We had decided to let go of the three other articles of impeachment because we felt that Article II is enough to remove the vice president from office,” pahayag pa ni Adiong.
Ginpaathag man sang spokesperson nga isa lamang ka conviction sa bisan diin sa mga impeachment article ang kinahanglan agud makakas sa puwesto ang respondent.
Suno sa iya, nagapati sila nga napamatud-an nila ang betrayal of public trust kag ang culpable violation of the Constitution, bangud una sa tanan, ang mga dokumento nga ila ginpasa naghalin mismo sa bise presidente.
Lakip diri, suno kay Adiong, ang Statement of Assets, Liabilities, and Net Worth (SALN) nga mismo si Duterte ang nagpirma kag nagsumpa nga husto ang mga impormasyon nga iya ginpahayag. Apang, suno sa prosekusyon, wala ini nagasanto sa mga rekord nga ila ginbusisi halin sa Bureau of Internal Revenue (BIR), mga rekord kag account sa bangko, kag iban pa nga mga dokumento.
Dugang niya: “The burden of evidence shifted to the defense, and I think it’s time that they can also provide documents that would prove that despite the allegations, despite the testimonies from AMLC, from bank managers, from many other witnesses we have presented in the impeachment court, walang culpable violation ang ating bise presidente.”
Natalana nga mag-resume ang impeachment proceedings sa Nobyembre 9, 2026 kun matapos na ang three-week recess para sa mga senador nga nagtutok anay sa deliberasyon sa 2027 national budget.#
