Ginpasangkad sang Iloilo Central Market Vendors Association ang ila monitoring sa merkado kasunod sang natabo nga pagpangawat sang apat ka menor de edad sang nagligad nga adlaw.
Sa interview sang Bombo Radyo kay Pinoy Barroca, ang Presidente sang Iloilo Central Market Vendors Association, iya ginpahayag nga mas ginpabaskog nila ang pagbantay, ilabi na sa mga kabataan nga nagasulod sa merkado, agud malikawan ang kaangay nga insidente.
Dugang pa niya, nakuhaan na nila sang impormasyon ang mga menor agud makabulig sa ila monitoring kag agud ma-prevent man ang posible nga liwat nga pagpangawat sa merkado.
Suno kay Barroca, posible nga ang kapigaduhon ang isa sa mga rason nga nagatulod sa pila ka kabataan nga mangita sang kwarta paagi sa pagpangawat.
Gani, ginpanugyanan sang asosasyon ang mga ginikanan nga mas tutukan kag bantayan ang ila mga kabataan.
Ginpahanumdom man ni Barroca ang mga vendors nga indi lamang dapat magpokus sa pagbaligya kundi kinahanglan man nga siguruhon nila ang seguridad sang ila mga baligya kag pwesto antes magpauli.
Samtang, ginpahayag sang vendors association kag sang opisina sang LEEO nga ila tingwaan nga indi na liwat matabo ang kaangay nga insidente.
