Nagagamit ang China sang propaganda agud nga impluwensyahan ang mga pumuluyo kag agud nga magbahin-bahin ang mga Pilipino sa isyu sang teritoryo kag soberanya.
Ini ang ginpahayag ni Defense Secretary Gilberto “Gibo” Teodoro sa iya pag-atubang sa Senate hearing kaangot sa 2027 nga budget sang Department of National Defense kag sang mga ahensya nga sakop sini.
Suno sa tiglikom, kabahin sang ginagamit sang People’s Liberation Army sang China nga propaganda kag mga aktibidad nga nagatuyo sa pag-impluwensya sa panghunahuna sang mga tawo amo ang estratehiya sang Communist Party of China nga ginatawag nga United Front Work.
“There really is and they admit it–that it’s part of the United Front Work, which is a pillar of their Communist Party,” suno sa Defense official. “[That’s] part and parcel of their tactics. We can really see that–with a straight face, they will say ‘That is ours’, even if they don’t have the right.”
Nagpaandam ini nga kun tugutan ang mga naratibo sang China sa West Philippine Sea, mahimo na lamang nga normal ang amo nga claim sa mata sang publiko.
“If we don’t stand up against that narrative, it will be normalized. They will say, ‘You accepted it; you didn’t say anything’. So it’s better to stand up for what is right, rather than lose what is ours by default,” dugang sini.
Samtang, ginpanawagan naman ni Senate Finance Committee Chairperson Senator JV Ejercito ang mga Pilipino nga magpabilin nga mabinantayon batok sa posible nga disinformation kag mga operasyon nga nagatuyo sa pag-impluwensya sa publiko.
Ginpaathag niya nga mahimo gamiton ang social media sa pagpalapnag sang sayop nga impormasyon kag sa pagpalawig sang pagka-bahinbahin sang mga Pilipino, ilabi na sa mga isyu nga may kaangtanan sa interes sang pungsod.
Dugang ni Ejercito, mahimo gihapon nga tahuron sang mga Pilipino ang katawhan sang China samtang ginakontra ang mga lihok sang ila gobyerno nga nagalapas sa soberanya sang Pilipinas.
Nahibaluan nga nangin kontrobersyal halin pa sang nagligad nga semana ang pahayag ni Chinese envoy Jing Quan nga kun maggamit ang China sang pwersa, madali para sa ila nga lupigon ang Pilipinas.#
