Natalana nga istoryahan kag botohan sa Senado ang resolusyon nga gin-file ni Senator Erwin Tulfo nga nagapanawagan nga ideklarar nga persona non grata ang Chinese Ambassador nga si Jing Quan.
Ini bangud sa iya kontrobersyal nga mga pahayag nga ginkabig sang gobyerno sang Pilipinas nga daw indi direkta nga pagpamahog sang paggamit sang puwersa.
Paagi sa Senate Resolution Number 739, ginpahayag ni Tulfo ang seryoso nga pagkabalaka sang Senado sa pahayag ni Jing nga madali lang mapierde sang China ang Pilipinas kon maggamit ini sang puwersa.
Sa iya nagligad nga pahayag, matandaan nga nagsiling si Jing nga dapat magpasalamat ang Pilipinas bangud may kaiping ini nga pungsod pareho sang China.
Suno sa iya, madali lang nila mapierde ang Pilipinas kon maggamit sila sang puwersa, apang ginpahayag niya nga indi nila ini paghimuon bangud luyag nila ang kalinong.
Sa resolusyon, ginpanawagan ni Tulfo sa DFA nga irekomendar sa nagakaigo nga mga awtoridad ang pagdeklarar kay Jing nga persona non grata, bangud sa kabug-at sang iya mga pahayag kag sa posible nga epekto sini sa soberanya, dignidad sang pungsod, kag relasyon sang Pilipinas kag China.
“Lalo na po kasi imbis na mag-tone down sa sinabi niya na ‘Kayang-kaya kong talunin ang Pilipinas,’ ay hindi pa po, e. Naano pa pong nagsabi na parang nangunguntsaba na ‘Eh di i-persona non grata n’yo ako. Tingin natin, sigurado na iba-ban namin kayo sa China,’” suno pa kay Tulfo.
Ginalauman nga maistoryahan ang resolution sa pagbalik sang plenary session sang Senado sa Nobyembre 9.
