Gin-ako sang Metro Pacific Iloilo Water (MPIW) nga nagapangatubang sang water supply deficit ang Iloilo bangud sa nagataas nga demand sa tubig.
Suno kay Angelo David Berba, Chief Operating Officer sang MPIW, nagataas ang demand sa tubig bangud sa pagdamo sang populasyon kag madasig nga pag-uswag sang mga commercial establishments, condominiums, hotels kag residential communities.
Pahayag niya, ang water demand sa service areas sang kumpanya nagalab-ot na sa 180 million liters kada adlaw, samtang ang available nga supply ang yara lamang sa 18 million liters kada adlaw.
Bangud sini, nagakinahanglan pa sang dugang nga tubig nga nagalab-ot 100 million liters kada adlaw.
Ginpahayag ni Berba, agud masolusyonan ang nasambit nga kakulangan nga supply sang tubnig, nagaplano ang kumpanya nga mag-invest sang ginabulubanta ₱5 billion para sa mga pipeline projects subong nga tuig kag sa masunod nga tuig.
Lakip man sa investment ang pagbutang sang bag-o nga mga pipelines kag pag-ilis sang daan kag nagakadunot na nga mga tubo.
Dugang pa niya, kabahin man sang ila mga plano ang desalination facility sa Ingore, La Paz, nga magaproseso sang tubig halin sa dagat, kag ang ginaplano man nga Jalaur water supply project nga ginalauman nga makadugang sang 86 million liters nga tubig kada adlaw.
Paagi sa sini nga mga proyekto, ginatinguhaan sang MPIW nga madugangan ang suplay sang tubig kag masolusyonan ang nagataas nga kinahanglanon sang mga konsumidor sa Iloilo.
