Ginalantaw nga isa ka pagpanghangkat ang pagpasiguro sang igo nga suplay sang tubig sa Iloilo City bangud sa pagdamo sang populasyon kag pag-uswag sang mga negosyo kag industriya sa syudad.
Sa interview sang Bombo Radyo kay Engineer Terence Uygongco, board of director kag chairman sang Metro Iloilo Water District (MIWD) kag Iloilo Economic Development Foundation, Inc. (ILEDF), iya ginpahayag daku nga pagpanghangkat sa water security ang pagsiguro nga makasunod ang supply sang tubig sa padayon nga pagtaas sang populasyon kag ekonomiya sang syudad.
Suno kay Uygongco, kadam-an sang water sources sa subong sa syudad ang nagahalin sa ground water ukon tubig sa idalum sang duta kun sa diin limitado lamang ang supply sini.
Apang, pahayag man niya nga indi man tanan nga water sources ang mahimo makuha ukon magamit sang mga water utility bangud kinahanglan ini sang nagakaigo nga water rights kag permiso.
Ginpahayag man niya nga ginalantaw nga makatuga sang daku nga kabalaka kag pagpanghangkat sa syudad ang posibilidad sang mabaskog nga El Niño nga mahimo magdugang sa problema sa suplay sang tubig.
Dugang pa ni Oygongco, kinahanglan masiguro ang igo nga suplay sang tubig indi lamang para sa mga panimalay kundi pati sa mga negosyo kag industriya sa Iloilo.
Ginpunto niya nga kon kulang ang suplay sang tubig kag kuryente, mahimo ini makaapekto sa pag-uswag sang ekonomiya sang Iloilo kag sa pagsulod sang mga bag-o nga negosyo kag investments.
