Gin-aprubahan na sang Sangguniang Panlalawigan ang ₱7.86-bilyon nga budget sang provincial government para sa 2027, nga pagagamiton sa infrastructure projects, operasyon sang mga district hospital kag iban pa nga essential public services.
Ang nasambit nga budget para sa 2027 ang mas mataas sang ₱980.26 milyon ukon 14.2 percent ikumpara sa ₱6.88-bilyon nga budget sang probinsya sang 2026.
Sa total nga budget, ₱6.102 bilyon ang gin-alokar para sa General Fund, samtang ₱1.759 bilyon ang para sa Local Economic Enterprises.
Suno kay Iloilo Fourth District Board Member Dominic Paul Oso, chairman sang Committee on Appropriations, ang pag-aprubar sang budget resulta sang lima ka adlaw nga committee hearings kag deliberations, kun sa diin ginpresentar sang mga department head ang ila proposed programs, projects kag activities para sa 2027.
Paagi sa sini nga proseso, narepaso sang mga board member ang proposed budget sang kada departamento kag nakahatag sang recommendations agud mapauswag ang spending priorities sang probinsya.
Lakip sa General Fund ang sweldo kag benepisyo sang mga empleyado sang provincial government, amo man ang maintenance and other operating expenses sang mga opisina kag programa sang gobyerno.
May ara man nga ₱160.82 milyon para sa capital outlay, nga igagamit sa pagbakal sang mga kagamitan kag iban pa nga long-term assets kag projects; ₱1.166 bilyon para sa 20 percent National Tax Allotment Development Fund; kag ₱305.08 milyon para naman sa Provincial Disaster Risk Reduction and Management Fund.
Ginpahayag man ni BM Oso, isa sa mga ginpauswag sa 2027 Appropriation Ordinance amo ang pagsunod sa prescribed format sang Budget Operations Manual.
Ang 207-page nga ordinansa nagalakip sang detalye sang sources kag paggamit sang pondo, expenditure classifications, special purpose appropriations, statutory kag contractual obligations, kag mga probisyon parte sa pag-create, abolition kag transfer sang positions.
Ginpabug-atan man niya ang importansya sang pagbutang sang pondo para sa mga provincial ordinance agud masiguro nga ma-implementar sang nagakaigo nga mga opisina ang mga polisiya sang probinsya.
