Nag-amat-amat na nga naga-offer ang mga manug-paninlo sa Molo Cemetery sang ila serbisyo para palaabuton nga Pista Minatay.
Sa interview sang Bombo Radyo kay Paul Dialogo, isa sa mga manug-paninlo sa nasambit nga patyo, iya ginpahayag nga tatlo na ka semana sila nga nagatrabaho sa patyo bangud nga naga-amat-amat naman nga nagadamo ang mga tawo nga nagabisita
Suno kay Dialogo, iya nga ila na nga kinaandan ang pagpanglimpyo sa patyo kada pista minatay.
Pahayag niya, magluwas sa ila nga bayad nga mga serbisyo, ila man ginalimpyohan ang palibot kag mga alagyan sa patyo agud mangin matinlo kag safe ini para sa mga magabisita sa ila mga himata.
Ginpahayag man ni Dialogo nga ila ginapaabot nga sa Oktubre 29 tubtob 31, mas madamo ang magakuha sang ila serbisyo pareho sang pagpangpinta sang pantyon bangud nga sa amo nga mga adlaw mas nagadamo ang mga nagabisita sa patyo.
Dugang pa niya nga apisar matapos na ang pista minatay, nagapadayon sa gihapon ang ila nga pagpanglimpyo ilabi na sa pagkolekta sang mga basura nga nabilin sa patyo.
