Ginalantaw sang Department of Agriculture (DA) nga mahimo maglab-ot sa P20-billion ang kaperdihan sa sektor sang agrikultura bangud sa El Niño sa 2026 tubtob 2027.
Ini ang mas mataas kumpara sa halos P16 billion nga kaperdihan sang 2023 tubtob 2024, sandig sa datos sang DA.
Suno kay Agriculture Secretary Francisco Tiu Laurel Jr., bangud sa mas malawig nga tig-ilinit kag kakulang sang ulan mahimo ini nga magpabuhin sang suplay sang tubig kag makahalit sa mga pananom.
Ginalantaw man sang ahensya nga mahimo maglab-ot sa 1 million metric tons ang madula nga produkto kag 350,000 hectares sang duta ang maapektuhan, mas mataas kumpara sa 828,000 metric tons kag halos 280,000 hectares sang nagligad nga El Niño.
Nagpatigayon man sang imbestigasyon ang DA angut sa nagadugang nga importasyon sang baboy agud mahibaluan kon may direkta ini nga epekto sa lokal nga mga hog raiser, ilabi na sa farmgate prices kag ila nga kita.
Matandaan nga nagapaandaman ang PAGASA nga mahimo mangin mas mabaskog ang epekto sang El Niño sa katapusan sang 2026 kag magpadayon tubtob sa una nga tunga sang 2027.
