Ginpahayag ni Iloilo City Vice Mayor Lady Julie Grace “Love-love” Baronda nga ginkuhaan siya sang boses sa City Council matapos nga gin-adoptar sang majority bloc ang DILG Opinion No. 95, Series of 2025, kag ginlakip ini sa Internal Rules of Procedure sang konseho.
Sa interview sang Bombo Radyo kay VM Baronda, iya ginpahayag nga isa ka uyang nga tikang ang gin-ubra sang majority bangud imbes nga suportahan ang mga legislative measure nga mahimo makabulig sa siyudad, ginpili sini nga limitahan ang iya functions bilang vice mayor.
Suno kay Baronda, ang iya papel sa konseho amo na lamang ang mangin presiding officer, magboto kon may tabla nga boto kag indi naman siya makapartisipar sa deliberations ukon makaduso sang mga resolusyon sa floor.
Ginpahayag man niya nga bilang National Chairperson sang National Movement of Young Legislators (NMYL), wala siya sang nahibaluan nga iban nga vice mayor sa pungsod nga ginlimitahan ang legislative functions sa amo nga paagi.
Ginpakigbahin man nila nga ila na ini nadiskusyunan sa ila mga convention, kag natingala ang iya mga kaupdanan nga legislators sa tikang nga ginhimo sang Iloilo City Council batuk sa iya.
Ginpunto ni Baronda nga wala man sang disadvantage sa siyudad kon ang vice mayor ang mangin aktibo sa pagduso sang mga ordinansa kag resolusyon.
Ini bangud bilang miyembro sang Sangguniang Panlungsod, dapat hatagan siya sang oportunidad nga makapartisipar sa deliberations kag legislative actions, suno sa iya paghangop sang Section 458 sang Local Government Code.
Pahayag pa sang bise alkalde, may yara siya sang 12 ka proposed ordinances kag isa ka proposed resolution ang pending pa sa nagkalain-lain nga committee sang konseho.
Apang, wala pa siya sang kasiguraduhan kon ano ang mangin masunod nga tikang sa sini nga mga ordinansa, bangud suno sa iya, magadepende na sa mga committee chairman kon paano ini pagaatubangon, lakip ang posibilidad nga i-refile ang mga ordinansa sa konseho.
Ginpanindugan man ni Baronda nga indi niya pag-untatan ang pagduso sang iya mga ordinansa bangud ginpromisa niya ini sa mga pumuluyo kag nagapati man siya nga posible nga gusto lang sang majority nga magwa sa publiko nga wala siya sang legislative accomplishments sa iya termino.
Dugang pa niya, imbes nga magpokus sa pag-limit sang iya papel sa konseho, dapat unahon sang mga miyembro ang mga ordinansa nga makahatag sang solusyon sa mga problema sang siyudad, ilabi na sa ginaatubang nga super El Niño.
