Wala na naga-attend sang session ang SK Kagawad sang Barangay Oñate De Leon, Mandurriao, Iloilo City kag gina-imbestigahan na ang iya kaso matapos madakpan sa ginpatigayon nga drug buy-bust operation sa Barangay Tabuc Suba, Jaro, Iloilo City, pasado alas-7 sang gab-i, Oktubre 19.
Ini mismo ang ginkumpirmar ni Jelma Crystel Implica, Iloilo City Sangguniang Kabataan (SK) Federation President.
Suno kay Implica, gilayon niya nga gin-contact ang mga SK Chairpersons sa siyudad kag gin-check ang meeting minutes sang previous session kag kumpirmado nga absent na ang nasambit nga SK Kagawad.
“Ginpa-monitor naton kung ano ang iya performance, actually gin-check naton ang minutes sang ila meeting— wala na siya naga-attend,” pahayag ni Implica.
Samtang, nagaplano na ang SK Council sang Barangay Oñate kung ano ang himuon sa nasambit nga kagawad suno kay Implica.
Apang ginpaathag ni Implica nga hulatun gid anay ang due process bangud yara na ini sa kamot sang proper authorities, may nagakaigo nga imbestigasyon kag prosecution.
“Ma-wait kita sa due process. Pero as leader sang SK Federation, dapat ma-ensure naton nga ang mga SK leaders kag kabataan, indi gid ma-involve sa ilegal nga droga,” dugang pa niya.
Text by: Bombo Cyrene A. Nasis
