Wala napunggan sang Indiana Pacers two-time All-Star guard nga si Tyrese Haliburton ang pagtalangison kadungan sang madinalag-on nga pagbabalik sini sa basketball court masobra 16 ka bulan halin sang nakaangkon ini sang injury.
Si Haliburton ang nagpanguna sa 123-120 nga kadalag-an sang Pacers batok sa New Orleans Pelicans sa ila season opener sini nga Miyerkules, Oktubre 21.
Sa postgame interview, nangin emosyonal si Haliburton samtang nagapasalamat sa fans kag mga tumalan-aw nga nagsuporta sa iya pagbalik sa hampang sa Smoothie King Center.
Nakapuntos siya sang 23 puntos, duha ka rebounds kag 12 assists sa sulod sang 34 minutos nga game time.
Bisan pa nga gina-ako niya nga madamo pa ang dapat pasanyugon sang team, nagpabutyag siya sang paglaum sa direksiyon sang ila hampang kag nagpahayag man sang pagpabugal sa iya mga kaupdanan.
Nakaangkon sang injury sa Achilles tendon si Haliburton sa Game 7 sang NBA Finals batok sa Oklahoma City sang Hunyo 2025 rason nga wala siya nakahampang sa bug-os nga 2025-2026 season.
Sa iya katapusan nga full season, nag-average siya sang 18.6 puntos kag 9.2 assists kada hampang, nga may 47.3 porsiyento nga shooting halin sa field kag 38.8 porsiyento halin sa three-point range.
Antes siya na-injure sa Game 7 sang Finals, nakapuntos siya sang tatlo ka three-point shots sa sulod lamang sang pito ka minutos.
