Indi magpasakop sa ika-75 nga edisyon sang Miss Universe ang mga kandidata halin sa anum ka pungsod sa Southeast Asia bangud sa nagapadayon nga indi paghangpanay sa tunga sang mga opisyal sang beauty pageant.
Lakip sa mga pungsod nga wala sang mangin tiglawas sa kompetisyon amo ang Thailand, Vietnam, Indonesia, Malaysia, Singapore, kag Laos.
Nag-ugat ang problema sa indi pag-uyon sang Miss Universe Organization (MUO), nga ginapangunahan ni Raul Rocha, kag Miss Universe Eastern, isa ka regional division nga ginapangunahan ni Miss Grand International (MGI) founder Nawat Itsaragrisil.
Una na nga ginpahayag sang MUO nga wala sang awtoridad kag invalid halin pa sa umpisa ang mga Miss Universe franchise nga ginhatag sang Miss Universe Eastern sa anum ka pungsod.
Wala man nalakip sa online voting page sang kompetisyon ang mga kandidata nga sakop sang sini nga mga franchise.
Sa statement naman sang MGI, ginpahayag sang organisasyon nga indi na mahimo nga mapadala ang anum ka kandidata sa Puerto Rico sa kondisyon nga makasiguro sa ila kahimtangan, dignidad, seguridad kag patas nga pagtratar.
Gin-athag man sang MGI nga indi dapat pagkabigon nga boluntaryo nga pag-atras ang indi pagpakigbahin sang mga kandidata bangud suno sa organisasyon, nakuha nila sang legal ang ila mga Miss Universe franchise.
Suno pa sa MGI, magapabilin sa ila tagsa ka pungsod ang anum ka kandidata bilang mga tag-iya sang ila national title kag magapadayon sa pagtuman sang ila mga katungdanan suno sa mga kasugtanan nga nagadumala sa ila.
Pagahiwaton ang coronation night sang Miss Universe 2026 sa Puerto Rico sa Nobyembre 24.
Magatiglawas si Bea Millan-Windorski sa Pilipinas sa pagtinguha nga makuha ang ikalima nga korona sang pungsod sa Miss Universe, kasunod sang mga kadalag-an nanday Gloria Diaz sang 1969, Margie Moran sang 1973, Pia Wurtzbach sang 2015 kag Catriona Gray sang 2018.
