Naglab-ot sa kabug-usan nga P1 bilyon ang balor sang nabaton ni anay Ako Bicol party-list Rep. Zaldy Co nga may kaangtanan sa mga infrastructure projects sang gobyerno ukon ang flood control projects.
Ginbuyagyag ini ni Wilt Walter Rosales sa iya nga pagtestigo sa Sandiganbayan naangot sa hearing sa petisyon para sa piyansa ni ex-Speaker kag Leyte Rep. Martin Romualdez sa kaso nga plunder nga nagabalor P7.4 bilyon.
Si Rosales amo ang anay nga personal assistant sang star witness nga si Henry Alcantara, former engineer sang Department of Public Works and Highways (DPWH) Bulacan First District Engineering Office.
Kaupod si Alcantara sa mga akusado nga si Romualdez, Co, Joselyn Tragua kag Samchan Foreign Exchange Corporation President Felicito Cristobal Guevarra.
Ginsambit ni Rosales nga nagsobra P1 bilyon ang kabug-usan nga balor sang kickback nga nadul-ong kay Co sa 8 ka separado nga transaksiyon halin Pebrero 2022 tubtob Enero 2024.
Dugang pa sang testigo, 3 ka beses gindul-ong ang kwarta sa Horizon Residence sa Taguig City Kag 5 ka beses naman sa puluy-an ni Co sa Valle Verde, Pasig City.
Apang, wala ginpaathag ni Alcantara ang katuyuan sang mga pagdul-ong.
Dugang pa nga detalye, durabox ang gingamit sa mga transaksiyon sang tuig 2022 bag-o gin-islan sang maleta sang tuig 2023.
“Sampu-sampung bundle po na tig-P100,000. Kapag sampung bundle po, P1 milyon na iyon. Ang pinakamalaking halaga na nabilang ko po ay P100 milyon,” pahayag ni kay Rosales.
Kasunod sini, kun wala si Alcantara sa tion sang pagdul-ong sang minaleta nga kwarta, nagapangayo ini sang acknowledgement receipt nga may pirma sang mga executive assistant ni Co nga sanday John Paul Estrada ukon Mark Ticsay.
Pahayag pa ni Rosales, gilayon nga ginahaboy ni Alcantara ang mga resibo pagkatapos mapamatud-an nga nabaton na ang kwarta.
