Ginapangabay sang mga opisyal sang Barangay Timawa Tanza Zone 2, Iloilo City Proper ang mga pumuluyo nga magabisita sa Tanza Cemetery nga magbulig sa pagmentenar sang katinlo sa patyo kadungan sang Pista Minatay.
Ang Tanza Cemetery amo ang isa sa pinakadaku nga sementeryo sa syudad sang Iloilo.
Sa interview sang Bombo Radyo kay Micar Flores, secretary sang amo nga barangay, iya ginpahayag nga kun magbisita sa nagtaliwan nga himata, mas maayo nga magdala na lang sang garbage bag agud nga direkta nga mahimos kag maputos ang basura kag bitbiton pa-gwa agud mahaboy sa basurahan.
Dugang sini, may yara man sang mga kabataan kag pumuluyo sa palibot nga mahimo mapalihog kag mabayaran sa pagpanglimpyo kadungan sang All Souls’ Day.
Suno kay Flores, sa bahin sang barangay officials, naka-designate na sang assignment sa tagsa ka kagawad agud nga mapabilin ang katawhay kag kalinong para nga mangin matalunsay ang pag-obserbar sang Pista Minatay.
Ginatutukan man suno sa iya ang illegal parking sang mga tricyle, e-bike, kag traysikad sa patyo agud nga makabuhin sang kagutok kun magdugok na ang mga tawo sa patyo.
