Indi na kinahanglan ni Pope Leo XIV ang dugang nga treatment matapos nakuha na sang mga doktor ang cancerous tumor sa iya baga.
Sandig ini sa statement sang Vatican nga ginbase sa resulta sang pag-usisa sa kahimtangan sang ikaayong-lawas sang 71-anyos nga Santo Papa.
Sa medical bulletin sang Vatican, ginkumpirma sang mga doktor nga ang tumor nga ginkuha sang Oktubre 13 amo ang lung adenocarcinoma nga isa ka klase sang cancer sa baga.
Gin-athag sang mga doktor nga limitado lamang sa isa ka bahin sang baga ang amo nga balatian.
Suno kanday Dr. Luigi Carbone kag Professor Stefano Margaritora, nakumpirma kasunod sang ila pag-usisa nga indi na kinahanglan ang dugang nga pagbulong sa cancer.
Gin-operahan ang Santo Papa sa Gemelli Hospital sa Roma sang Oktubre 13 inadlaw matapos niya ginpahibalo sa mga tumuluo sang Oktubre 11 nga operahan siya agud kuhaon ang bukol sa iya baga.
Nakagwa sa amo nga ospital si Pope Leo XIV sang Oktubre 17.
Sang Domingo, ginpahayag niya nga amat-amat niya nga balikan ang iya mga katungdanan bilang lider sang Simbahang Katolika.
Nagdulot sang kabalaka sa Roman Catholic Church ang iya balatian ilabi na ang posibilidad nga maapektuhan sang malawig nga radiotherapy ukon chemotherapy ang iya ikasarang sa pagpanguna sa simbahan.
Si Pope Leo XIV amo ang una nga Amerikano nga napilian bilang Santo Papa. Na-eleher siya sa sini nga katungdanan sang nagligad nga tuig.#
