Gintawag sang labor group nga General Alliance of Workers Association (GAWA) nga “disgusting” ang P40 tubtub P45 nga daily minimum wage increase para sa mga nagatrabaho sa pribado nga sektor diri sa Western Visayas.
Ini matapos ginsapubliko sang Regional Tripartite Wages and Productivity Board (RTWPB) 6 nga napirmahan na nila ang amo nga saka sa sweldo kag ginpasa na sa National Wages and Productivity Commission (NWPC) para sa review kag reaffirmation.
Sa interview sang Bombo Radyo kay Wennie Sancho, Secretary-General sang GAWA, iya ginpahayag nga wala gani na-restore ang purchasing power sang mga mamumugon nga posible kuntani matabo kun gin-aprubahan ang bisan P80 tubtub P100 lang nga saka sa sweldo.
Suno kay Sancho, kinahanglan ini kuntani sang private sector workers ilabi na nga ginapaabot ang Paskwa.
“Ang reaksyon namon dira sa GAWA is that ka-disgusting. Kay ngaa disgusting siya? Kay it did not even restore the purchasing power of the workers,” suno kay Sancho.
Dugang niya, tuman ka gamay ang gin-aprubahan sang board kag makabig nga sensilyo lamang.
“I don’t think any worker would be satisfied with that,” pahayag pa sini. “The P40-P45 wage increase per day would be negated by the unabated increases by the prices of basic goods and services. More importantly, it would be eaten by inflation.”
Dugang pa sini: “Masyado kagamay. Loose change ang ginhatag.”
Ginpahayag man sini nga halin sang una tubtub subong, ang wage increase nga ginapirmahan sang board ang wala gid nagabag-o sa economic status sang mamumugon.
Nahibaluan nga sa idalom sang Republic Act No. 6727 ukon ang Wage Rationalization Act, ang regional wage boards amo ang naga-set sang minimum wages para sa ila tagsa ka area.
Ang bag-o nga wage rates maga-cover sa private-sector workers sa Western Visayas lakip na sa Negros Occidental kag sa Bacolod City.
Bangud sini nga adjustment, magalab-ot ang pinakamataas nga daily minimum wage sa Western Visayas sa P590 para sa non-agricultural workers kag P565 naman para sa agricultural workers.
Sa amo nga desisyon, ginpaathag ni Department of Labor and Employment (DOLE) Region 6 director Atty. Sixto Rodriguez Jr., chairman sang regional wage board, nga ginbalanse nila ang paghatag sang dugang nga financial relief sa mamumugon kag ang pagsiguro nga makasarang man ang mga negosyo ilabi na ang magagmay nga establisyemento nga makasustiner sa ila gasto sa operasyon.”
