Kasunod sang direktiba ni President Ferdinand Marcos Jr., nga maprotektahan ang tanan nga mga Filipino workers subong nga mabatyagan na ang epekto sang El Niño sa pungsod, nagpaguwa man sang Labor Advisory ang Department of Labor and Employment.
Sa idalom sang Labor Advisory No. 19, Series of 2026, nga pirmado ni DOLE Secretary Francis Tolentino, mahimo makabatun sang compensation ang isa ka trabahante sang pribado man ukon pampubliko nga sector sa idalom sang Employees’ Compensation Program (ECP) sa tion nga makaeksperyensya ini sang work-related heat illnesses kaangay sang heat stroke, heat cramps, kag heat exhaustion.
Magapaidalom ini sa assessment sang Social Security System (SSS) ukon Government Service Insurance System (GSIS) kun matuod nga may ara sang kahilabtanan ang sakit sang isa ka trabahante sa trabaho sini.
Dugang pa sang DOLE, importante nga antes makakuha sang compensation, may ara anay sang ipresentar nga mga dokumento ang mga empleyado nga Certificate of Employment, Job Description, Incident report, kag EC logbook Entry.
