Naglab-ot sa ginabulubanta nga P9.3 milyon ang danyos sang sunog nga naglamon sa 15 ka estruktura sa Poblacion Zone II, Estancia, Iloilo, nga nagsugod ala-1 kaina sang kaagahon.
Sa interview sang Bombo Radyo kay FO1 Louie Dionido, iya ginpahayag nga nagdangat sa third alarm ang sunog, nga nagkinahanglan sang pagresponde sang siyam ka fire station.
Bangud sa kadakuon sang kalayo, nagpatigayon man sang pagresponde ang mga bombero halin sa mga malapit nga banwa sang Sara, Batad, Balasan, Carles, San Dionisio, Concepcion, Ajuy kag Lemery agud buligan ang pagpalong sang sunog.
Lakip sa mga estruktura nga nasunog ang grocery store, tubigan, repair shop, poultry store kag iban pa nga nagkalain-lain nga establishmento.
Suno kay Dionido, wala man sang may na-rekord nga napilasan sa insidente.
Pahayag pa niya, naglab-ot halos duha ka oras ang pagpakig-away sang mga otoridad sa sunog antes ini nga napalong.
Padayon naman ang imbestigasyon sang Bureau of Fire Protection (BFP) Estancia agud mahibaluan ang gintunaan sang sunog.
