Ginsaysay sang isa ka foreman sa Barangay Sto. Rosario-Duran, City Proper, nga nagabakal lamang sang fishball ang ila kaupod nga isa sa mga napatay sang nagluntad ang shooting incident kaina sang kaagahon.
Ginkilala ang biktima nga si Angelito Tobinasa, 35 anyos, residente sang Barangay Osorio 2, San Remigio, Antique.
Sa interview sang Bombo Radyo kay Alejandro Pama, foreman sa construction site, iya ginpahayag nga nagatrabaho bilang construction worker si Tobinasa sa Casa de España sa City Proper kag naga-board lamang sa Barangay Sto. Rosario-Duran.
Base sa inisyal nga impormasyon, gintiro sang 36-anyos nga si Anthony Sta. Lucia ang iya kasimaryo nga si Conrad Gabo, 36 anyos, samtang nagainom-inom ini kaupod ang iya mga abyan.
Nakaangkon sang igo sang bala sa likod kag ulo si Gabo nga gintunaan sang iya kamatayon.
Samtang, malapit lamang sa lugar sang pagpangtiro si Tobinasa kag nagabakal sang fishball sang nasalabat siya sang bala nga nag-igo sa iya ilok.
Gindala pa sanday Tobinasa kag Gabo sa ospital, apang gindeklarar man sila nga ginbawian sang kabuhi.
Napahibalo na ang pamilya ni Tobinasa sa Antique kaangot sa kamatayon sang ila himata.
Nadakpan naman sa abandonado nga balay ang suspek kasunod sang insidente.
By: Bombo Jay Panizales
