Nagpabutyag si Sen. Panfilo “Ping” Lacson sang iya paglaum nga mangin matawhay ang pag-aresto kay Sen. Ronald “Bato” dela Rosa.
Suno kay Lacson, dapat mag-agi sa nagakaigo nga proseso si Bato bangud iya ini kinamatarong bilang Pilipino.
Nahibaluan nga nagtanyag si Department of Interior and Local Government (DILG) Secretary Remulla sang P50 million nga reward para sa pag-aresto kay Bato nga una na ginhatagan sang isa ka semana nga ultimatum agud mag-surrender.
Si Bato ang ginapatihan nga nagapanago sa Mindanao kag protektado sang isa ka armado nga grupo.
Madumduman nga nagpakita pa ang pugante nga senador sang Mayo 11 para magboto kay Sen. Alan Peter Cayetano para mangin Senate President apang nalagyo ini pagkatapos sang shooting incident sa sulod sang Senado sang Mayo 13 kag nangindulaan na humalin sang amo nga adlaw.
