Nalipay si Councilor Sheen Marie Mabilog matapos ginkakas ang tinaga nga “USWAG” sa proposed negosyo credit program kasunod sang iya pagkuwestiyon sa paggamit sini bangud sa posible nga paglapas sa Anti-Epal policy sang Department of the Interior and Local Government (DILG).
Sa second reading sang Sangguniang Panlungsod subong nga adlaw, Oktubre 27, gin-islan ang orihinal nga ngalan nga “USWAG Negosyo Credit Access for Resilient Enterprise (CARE) Program” sang “UNA Negosyo Credit Access for Resilient Enterprise (CARE) Program,” matapos magsugot ang author sini nga si Councilor Rudolph Ganzon sa ginpanugyan nga pagbag-o.
Madumduman nga sa nagligad nga session, ginkuwestiyon ni Mabilog ang paggamit sang “USWAG,” nga madugay na nga naangot sa Treñas administration, kag ginpamangkot kung ang paggamit sini sa proposed ordinance nagasunod sa Anti-Epal policy.
Ginpamangkot man niya si Ganzon kung ang “UNA” nagatumod sa “Uswag Negosyo Academy,” isa ka proyekto sang siyudad nga nagagamit gihapon sang tinaga nga “USWAG.”
Apang ginpaathag ni Ganzon nga ang “UNA” nagakahulugan sang first ukon una, nga nagalaragway sa proposed credit-access ordinance para sa mga magagmay nga negosyo sa siyudad.
Ginpasalamatan ni Mabilog si Ganzon sa pagtamod sang iya nga suhestyon
Madumduman nga si Ganzon amo man ang nag-author sang Anti-Epal ordinance sang Iloilo City.
Pasado na sa second reading ang proposed ordinance nga nagatuyo nga mapalapad ang access sa credit sang mga magagmay nga negosyo sa siyudad.
Text by: Bombo Cyrene A. Nasis
