Nagdangat sa masobra 2,000 ka mga residente sa sulod sang six-kilometer permanent danger zone (PDZ) sang Mayon Volcano sa Albay ang nag-evacuate pagkatapos ang paglupok sang bulkan.
Suno sa Albay Public Safety and Emergency Management Office (APSEMO), ang mga evacuees ang ginalakipan sang 531 ka mga pamilya halin sa Tabaco City, 205 halin sa Camalig, kag 10 halin sa Ligao City.
Samtang gina-monitor naman sang Local Government Unit (LGU) ang sitwasyon sa Malilipot, Legazpi City, Sto. Domingo, Daraga kag Guinobatan kag gin-abisuhan nga mag-standby ang mga residente sa posible nga pag-evacuate.
Ginpaidalum naman sa red alert sang APSEMO ang Provincial Disaster Operation Center agud nga magapadayon sa pagmonitor kag ang koordinasyon sa LGU kag response clusters.
Nakahatag sang 22,000 surgical masks sa mga health facilities ang Albay Provincial Health Office agud malikawan ang posible nga paghaklo sang ashfall halin sa 3 km nga ash plume sang bulkan.
Ginapaandaman man sa publiko nga magpalayo sa 6-km PDZ bangod sang possible lava flows kag hazardous pyroclastic density current ukon ang ginatawag nga uson.
